Martes sa Ika-4 na Linggo
ng Apatnapung Araw na Paghahanda
Martes, Marso 17, 2026
Ezekiel 47, 1-9. 12
Salmo 45, 2-3. 5-6. 8-9
D’yos na makapangyariha’y
kapiling nating kanlungan.
Juan 5, 1-16
Pambungad na Awit:
Himig Pasyon, Himig 9
Traditional
Antipona:
Kayong mga nauuhaw
ang inumi'y pagsaluhan
Magsiinom at mas'yahan
walang bayad, malinamnam
itong tubig na dalisay
Unang Pagbasa:
Ezekiel 47, 1-9. 12
Pagbasa mula sa aklat ni propeta Ezekiel
Bumalik kami sa pintuan ng templo. Sa ilalim nito’y may agos ng tubig papunta sa silangan. Ang templo’y paharap sa silangan. Ito’y nagmumula sa gawing timog na bahagi ng templo, sa gawing timog ng altar. Lumabas kami sa pintuan sa gawing hilaga at iniligid niya ako papalabas sa pintuan sa gawing silangan. Doon ay may mahinang agos ng tubig mula sa gawing timog ng hagdanan.
Nagtuloy kami sa gawing silangan; may hawak siyang panukat. Sumukat siya ng limandaang metro. Pagkatapos, lumusong kami sa tubig na hanggang bukung-bukong. Sumukat uli siya ng limandaang metro at nang lumusong kami sa tubig, ito’y hanggang baywang. Sumukat uli siya ng limandaang metro ngunit yaon ay isa nang ilog at hindi na ako makalusong. Malalim ang tubig at kailangang languyin upang matawid. Sinabi niya sa akin, “Tao, tandaan mo ang lugar na ito.”
Naglakad kami sa pampang ng nasabing ilog. Nang ako’y pabalik na, nakita ko ang makapal na puno sa magkabilang pampang ng ilog. Sinabi niya sa akin, “Ang tubig na ito ay papunta sa dakong silangan, hanggang Dagat na Patay. Pag-abot nito sa Dagat na Patay, malilinis ang tubig nito. Lahat ng lugar na maagusan nito ay magkakaroon ng lahat ng uri ng hayop at isda. Pagdating ng agos na ito sa Dagat na Patay, magiging tabang ang tubig ng dagat. Lahat ng lugar na abutin nito ay magkakaroon ng buhay. Sa magkabilang pampang ng ilog ay tutubo ang sari-saring punongkahoy na makakain ang bunga. Hindi malalanta ang mga dahon nito ni mawawalan ng bunga pagkat ang didilig dito ay ang tubig na umaagos mula sa templo; ito ay patuloy na mamumunga sa buong taon. Ang bunga nito ay pagkain, at gamot naman ang mga dahon.”
Ang Salita ng Diyos.
Salmong Tugunan:
Salmo 45, 2-3. 5-6. 8-9
D’yos na makapangyariha’y
kapiling nating kanlungan.
Ang Diyos ang lakas natin at kanlungan,
at handang saklolo kung may kaguluhan;
di dapat matakot, mundo’y mayanig man,
kahit na sa dagat ang bundok mabuwal.
D’yos na makapangyariha’y
kapiling nating kanlungan.
May ilog ng galak sa bayan ng Diyos,
sa banal na templo’y ligaya ang dulot.
Ang tahanang-lungsod ay di masisira;
ito ang tahanan ng Diyos na Dakila,
mula sa umaga ay kanyang alaga.
D’yos na makapangyariha’y
kapiling nating kanlungan.
Nasa atin ang Diyos Makapangyarihan,
ang Diyos ni Jacob na ating kanlungan.
Anuman ang kanyang ginawa sa lupa,
sapat nang pagmasdan at ika’y hahanga!
D’yos na makapangyariha’y
kapiling nating kanlungan.
Awit Pambungad sa Mabuting Balita:
Salmo 50, 12a. 14a
Misa Pasyon (Himig 2)
Nagpupuri kami sa'Yo,
Panginoong Hesukristo
D’yos ko, sa aki’y igawad
loobing tunay na tapat;
puso ko’y gawin mong wagas
nang manauli ang galak
bunga ng ‘yong pagliligtas.
Mabuting Balita:
Juan 5, 1-16
Ang Mabuting Balita ng Panginoon ayon kay San Juan
Nang dumating ang pagdiriwang ng pista ng mga Judio, pumunta si Hesus sa Jerusalem. Sa lungsod na ito, malapit sa Pintuan ng mga Tupa, ay may malaking deposito ng tubig na may limang portiko. Kung tawagin ito sa wikang Hebreo ay Betesda. Natitipon dito ang maraming maysakit —— mga bulag, mga pilay, at mga paralitiko. Hinihintay nilang gumalaw ang tubig, sapagkat may panahong bumababa ang isang anghel ng Panginoon at kinakalawkaw ang tubig. Ang maunang lumusong pagkatapos makalawkaw ang tubig ay gumagaling, anuman ang kanyang karamdaman. Doo’y may isang lalaking tatlumpu’t walong taon nang may sakit, at siya’y nakita ni Hesus. Alam nitong matagal nang may sakit ang lalaki. Tinanong siya ni Hesus, “Ibig mo bang gumaling?” Sumagot ang maysakit, “Ginoo, wala pong maglusong sa akin kapag nakalawkaw na ang tubig; patungo pa lamang ako roon ay may nauuna na sa akin.” Sinabi sa kanya ni Hesus, “Tumindig ka, dalhin mo ang iyong higaan, at lumakad ka.” At pagdaka’y gumaling ang lalaki, dinala ang kanyang higaan, at lumakad.
Noo’y Araw ng Pamamahinga. Kaya’t sinabi ng mga Judio sa lalaking pinagaling, “Araw ng Pamamahinga ngayon! Labag sa Kautusan na dalhin mo ang iyong higaan.” Ngunit sumagot siya, “Ang nagpagaling sa akin ang nagsabing dalhin ko ang aking higaan at lumakad ako.” At siya’y tinanong nila, “Sino ang nagsabi sa iyo na dalhin mo ang iyong higaan at lumakad ka?” Ngunit hindi nakilala ng lalaki kung sino ang nagpagaling sa kanya, sapagkat nawala na si Hesus sa karamihan ng tao.
Pagkatapos, nakita ni Hesus sa loob ng templo ang lalaki at sinabihan, “Magaling ka na ngayon! Huwag ka nang magkakasala at baka may mangyari sa iyo na lalo pang masama.” Umalis ang lalaki at sinabi sa mga Judio na si Hesus ang nagpagaling sa kanya. Dahil dito, si Hesus ay sinimulang usigin ng mga Judio sapagkat nagpagaling siya sa Araw ng Pamamahinga.
Ang Mabuting Balita ng Panginoon.
Awit sa Paghahanda sa Pag-aalay:
Awit ng Paghahandog
Eduardo Hontiveros
Kunin mo, O Diyos at tanggapin mo
Ang alak at tinapay na handog ng pag-ibig
Sagisag naming bayan mo
Ang handog na ito ay babaguhin mo
Magiging katawan at dugo mo
Mula sa Iyo kaloob na ito
Muli ay handog sa Iyo
Patnubayan mo't paghariang lahat
ayon sa kalooban mo
Mag-utos ka, Panginoon ko
Dagling tatalima ako
Ipagkaloob mo lamang na magbago ako't
sa wakas matulad sa'Yo
Santo:
Banal Ka Poong Maykapal
Himig Pasyon, Himig 3
Banal ka Poong Maykapal
Banal ang Iyong Pangalan
Banal ang 'Yong kaharian
Langit lupa'y nagpupugay
sa Iyong kadakilaan
Dinadakila ng lahat
ang naparito Mong Anak
na S'yang nagmulat sa bulag
sa Pilay ay nagpalakad
at nakiramay sa lahat
Pagbubunyi:
Sa Krus Mo
Himig Pasyon, Himig 3
Sa krus mo at pagkabuhay
kami'y tinubos Mong tunay
Poong Hesus naming mahal
Iligtas mo kaming tanan
Ngayon at magpakailanman
Dakilang Amen:
Dakilang Amen (Misa Pasyon)
Lemuel Asuncion
Ama Namin:
Ama Namin
Teofilo Vinteres
Ama namin, sumasalangit ka
Sambahin ang ngalan mo
Mapasaamin ang kaharian mo
Sundin ang loob mo
Dito sa lupa para nang sa langit.
Bigyan mo kami ngayon
ng aming kakanin sa araw-araw
at patawarin mo kami
sa aming mga sala.
Para nang pagpapatawad namin
sa nagkakasala sa amin
at huwag mo kaming ipahintulot sa tukso
at iadya mo kami sa lahat ng masama
Awit sa Pakikinabang:
I Seek You for I Thirst
Lionel Valdellon
Refrain:
Though many times I run from you in shame
I lift my hands and call upon Your name
For underneath the shadow of Your wings
My melody is You
Verse 1:
Oh Lord I seek You for I thirst
Your mercy is the rain on the desert of my soul
Oh Lord I raise my lifeless eyes
And see Your glory shine, how your kindness overflows
Refrain:
Though many times I run from you in shame
I lift my hands and call upon Your name
For underneath the shadow of Your wings
My melody is You
Verse 2:
Oh Lord Your sanctuary calls
I yearn to be with You in the rivers of Your love
Refrain:
Though many times I run from you in shame
I lift my hands and call upon Your name
For underneath the shadow of Your wings
My melody is You
Verse 2:
Oh Lord Your sanctuary calls
I yearn to be with You in the rivers of Your love
Refrain:
Though many times I run from you in shame
I lift my hands and call upon Your name
For underneath the shadow of Your wings
My melody is You
Pangwakas na Awitin:
Pagsamo kay San Jose
Manoling Francisco
Berso:
San Jose, ikaw ang tunay na huwaran
ng pag-ibig, katapatan, at kabanalan
O San Jose, sa iyo'y nananalangin
ang samo namin sa iyo, nawa'y dinggin
Koro: 2x
Akayin mo kami, ang bayan mong nangangarap
Gabayan mo po ang aming pagsisikap
Upang kaming lahat maging karapat-dapat
Kay Hesus 'yong sinisintang Anak
Koda:
Kay Hesus 'yong sinisintang... Anak
WAKAS
